BMW 130iA M-Sport Edition小鋼炮 Sport Look渾身M勁

BMW出名操控好，尤其幾款行直六偈嘅 1系，更可發揮大馬力又靈活嘅優勢，雨天劈水試車，依然又穩又定。廠方為催谷呢款小鋼炮，更推出 130iA M-Sport特別版，全套 M件上身兼入櫳，有軨有包圍，仲要跟齋版同價。「 M」，唔一定 Stand for Money嘅。

爆炸性觀感

■ M件上身後，骨位線條增多，更有浮凸立體感。

M呢個字，對寶馬迷嚟講，吸引力簡直猶如魔咒，好多車型加咗 M-Sport套件，賣價通常高幾萬以上。無他嘅，全原廠運動化設計配件，車外最顯眼靚仔位有頭尾唇同胎軨，保留雙腎式鬼面罩風格之餘，前後曲線實在立體得多，望見下方氣壩位換上蜂巢式欄柵，以及兩側霧燈附近嘅線條變化，令呢架 1系中最高性能嘅 130iA喺觀感上更具爆炸力。四條多輻式太陽軨， M字 Logo細細粒唔緊要，五口螺絲配極硬朗線條嘅柱位，已經夠晒搶眼醒神。內櫳 M套件亦數量頗多，包括前排座椅、真皮軚環、四條門檻、中控凹凸金屬飾邊，以及所有門內側飾邊等，整體保留 1系親切感覺之餘，視覺上又別有新鮮感，嗰種莫名優越感，又真係親身坐過先感受得到。

■設有電動天窗，令車櫳更具開揚感。

■前方座椅都換埋，將你承托得更穩如泰山。

■引擎用上 1系最高嘅 3.0L直六，馬力達到 265匹。

■雙出式尾喉唔係左右分開擺，但聲浪一樣好線性好悅耳。

■門內側同樣鋪設金屬飾邊，令車櫳不致黑沉沉。

■由上車一刻見到門檻個 M字開始，已經令人有額外優越感。

送 8萬 Parts

■中控台上方新增有凹凸紋銀邊。而內櫳最搶眼係有「 M」標徽嘅軚盤。

當年 1系係為寶馬踩入揭背車界嘅重點型號，但近年新版狂玩高性能， 125iA、 130iA到 135iA，更提升至 3.0L直六引擎，以今日呢架 130iA為例，馬力就達到 265匹， 0-100km/h只係 6.3秒，而且 M-Sport套件尚包含睇唔到嘅運動化懸掛系統，加上 50:50完美車重分佈，整體操控極易上手，就算拍攝日遇着陰晴不定天氣，喺直路試加速，又或迴旋處玩兜圈，一樣咁得心應手，大馬力車未必一定難駕馭，繼之前揸有尾 135iA後， 130iA係我另一至愛 1系。跟 135iA相比，兩廂式實用性的確更高，不過今時今日潮興旅行車款， 130iA車身亦唔算大，可以話平衡到載物量同油耗，最重要係優惠期內車價平咗 3萬，仲要有齊全套價值 8萬嘅 M-Sport Parts，前後加埋慳成 11萬 o架。