貪車仔細細易攝易泊，但又不時嫌唔夠力水？人就當然會貪心，只係好難咁理想，不過今日呢架 FordFiesta，竟然可以令我呢個貪心鬼收口。全因配備五速手動波箱，轉數幾多你話事，遇大斜路都唔腳軟，剎那間令人覺得：「車仔，都係棍波好！」
五速波箱力量自控
每當人車爭路、Cut線無人讓嘅時候，體積較細嘅車仔始終着數得多，加上現在細容積車仔款式選擇多，喺油費貴嘅情況下，唔少人都寧願棄大買小，慳得就慳。好似Ford於舊年全新推出嘅Fiesta，就吸引唔少新手入門，唔使十六萬元就可以擁有一部歐洲車，單係車價已經感覺很化算。加埋符合歐盟五期廢氣排放標準嘅1.4公升引擎，耗油量低又可慳一筆。仲係未夠抵？近期到港嘅手波版Fiesta就一定更合你心水，車價比自動波版平萬多元，唔使十四萬就有交易，而且棍波往往比自動波更慳油，有埋多點式電子燃油噴注嘅幫助，綜合油耗每百公里只需6.5公升，以$14/L油價計算，只需$0.9一公里，周圍遊車河都唔怕會肉赤。雖然兩個版本引擎一樣，但波箱就由四速自動波換上五前速手波，起跑更快更爽、力量操控更自如。沿途往西貢即使上大斜路段，乘客之中更有個二百磅嘅攝影師，車仔表現仍然有心有力，二波仲可以谷到上五千轉，唔似有啲自動波小車咁，踩盡油門都無力上。
■ Fiesta嘅車尾形態有點像迷你版嘅 Focus RS，充滿動感味道。
■德國旗車仔圖案，活潑可愛。
■棍波版可以按車主要求，為側鏡添色彩。
■梅花圖案合金輪圈勝在設計夠獨特。
■代理為棍波版加上線條拉花，強化腰線嘅動感形態。
獨有拉花色彩
其實 Fiesta本來就係以 KineticDesign打造全新外形，今整體感覺流線圓滑係最大特點，但原來棍波版本令效果更見突出，全因五門變三門嘅設計令車側線條更瀟灑更富動感。最令人放心係車身長度並無因此而變短，只係將前門拉長，所以後座空間依然闊落。除此之外， Fiesta嘅另一大特點就係14種鮮艷搶眼嘅原廠車身顏色，充滿夏日味道嘅紫紅、青綠及淺藍色令人印象深刻，香港代理仲刻意為棍波版再添色彩，好似今日所試駕嘅白色版本，代理將兩邊側鏡噴上黃色，加埋車側嘅一條黃色拉花，感覺特別醒神。白色車身所跟嘅藍黑鴛鴦色內櫳、座椅大小不一嘅圓形圖案拼成如星空嘅花紋，絕對不讓外表專美，沒有豪華配備卻有獨特色彩搭夠。
■單門尺碼增長嘅設計出奇地為 Fiesta增添魅力。
■白色車身所配襯嘅黑藍色鴛鴦櫳有型有格。
■後座摺合後嘅尾廂空間夠大，車仔一樣放得落單車到處郊遊。
■造型獨特嘅錶板充滿運動感。
■大小不一嘅圓形構成如星空嘅圖案，夠可愛又獨特。
■ Fiesta換上五速手波，操控感大大提升。
規格
引擎： 1,388cc直四 Euro IV環保引擎
馬力： 96ps/5,750rpm
扭力： 125nm/4,200rpm
傳動：五前速手波
|
發表於 2010-3-11 05:45 AM
| 