Nissan Fairlady 370Z Roadster　淑女 Open

日產 Fairlady其實早就毫不淑女，賽車場上曾贏過唔少雄赳赳嘅大馬力車種，接棒者370Z就以時代感盡蓋過往「街飛」味，魚鈎形頭尾燈更係靚得懾人心魄。 2010新版 Roadster熱辣到港，跟「Open」後嘅淑女同遊，春日暖風，吹得醉人。

So Cool開篷迎清風

早於去年東京車展，筆者已走訪過日產橫濱新總部，親身摸過坐過最新 Fairlady 370Z Roadster。今次到港Demo，跟日本的一樣噴上 ThemeColor，遠望似深啡色，陽光底下其實係紫紅色，喺香港算極冷門。但我欣賞佢似啡又像紫，有淑女心思難猜嘅特性，到底係循規蹈矩定熱情如火，全睇操控時嘅詮釋。硬頂版賣咗一年，開篷版千呼萬喚終到港，日產懶理世人追捧硬摺頂熱潮，依然故我繼續玩軟篷，好處起碼有三個。首先避免機械組件大幅增加而縮細內櫳及尾箱空間；第二係造價較平，毋須轉嫁成本至買家；最後係減輕車重，更為慳油。實地測試，20秒內完成開篷，表現中規中矩。但軟篷運作時近乎無噪音，最正係內櫳設備雖跟硬頂版相若，但開揚感不可同日而語，就算24℃高溫兼潮濕底下，迎着風遊車河，仍有無比清凉快感。

■真皮黑櫳襯軚盤上大大個 Z字，勁有味道。

■中控台以真皮鑲嵌，線條不圓不方，有高級跑車風範。

■暗紅色座椅幾搶眼，承托力及舒適度平衡得幾好。

■開篷後，雙門跑車上落一樣咁輕鬆。

■三圓錶板配紅針紅框，戰意滿瀉。

■門檻旁可望到 Bose喇叭，靚聲徐徐由下方滲出。

So Hot玲瓏身段性格火爆
開篷凉透心，但唔好忘記 370Z如火般嘅本性。頭尾燈大膽用上魚鈎形設計，就算半夜黑麻麻，齋睇燈都認得出 370Z。外柔內剛係370Z特色，圓潤車身卻配 3.7L V6偈，馬力達到333匹，對一架雙門雙座跑車嚟講，動力實在太充裕，唔玩棍波，齋以軚盤撥片嘆七速+/-，力量已如泉湧，仲要係日產最強嘅FR佈局，連攻彎都一樣咁好玩。硬頂同開篷版話就話基本規格相同，不過 Roadster仍有點點優越之處，如新加冷暖座椅、更多置物空間、高級版更配19"鍛造軨等，整部車都令人血脈奔騰。望住外形渾圓鼓起嘅車尾，真想拍打一下，輕叫：「 Let's go， Babe！」

■ 20秒完成開篷，叻在一啲都唔嘈。

■尾輪拱誇張地凸出，令車尾望落更渾圓。

規格
引擎： 3,696cc V6
馬力： 333hp/7,000rpm
扭力： 37kgm/5,200rpm
傳動：七速+/-自動波、後驅
售價：$639,800

搶睇搶試 Roadster
要率先親身感受 Fairlady 370Z Roadster嘅魅力，可以喺今、明兩天去到將軍澳嘅日產車展，現場除咗可細賞 Fairlady370Z Roadster外，仲有 Tiida、 Serena等熱門 Green車列陣。車展期間更設攝影比賽，下午一時至五時有埋靚Model駐場，靚女配靚車任影。詳情可致電查詢，或到官網http://www.nissan.com.hk瀏覽。

日期：今、明兩天（ 10am-9pm）
地點：將軍澳新都城中心二期商場 1樓展覽場地