百萬太陽之子　晒命唔眨眼

09年尾福士喺科技園搞大 Party，對當時首度到港嘅Phaeton一直念念不忘，今日終於有機一試呢架百萬豪車。車名嚟自希臘神話太陽神之子，唔止形容 4.2V8嘅剛烈性能，極豪本質行出街亦如晒命般耀眼。

有空間　高妹話唔慣
一提福士，咪淨係識得 Golf同 Passat呢類咁入屋嘅車，事實歐美早已推出百萬身價嘅 Phaeton車系，新款亦於 09年尾在港曝光。Phaeton同中文「飛騰」讀法一樣，源自希臘神話太陽神Helios之子。基本上喺街遇到機會唔多，主因係港人品牌情意結，畀成百萬，大部份人都會揀番「 ABBL」（ Audi、 Benz、 BMW、Lexus）。今日親身試揸試坐，首先被空間感震懾。我身高 183cm， Model都有171cm，一前一後坐膝頭哥居然仲有成呎位剩，大家都話好唔慣。新加 TwoTone皮椅，灰藍配米色順眼舒服，前座雙電控座椅，連「腳瓜啷」位都可校前校後，幾高幾矮雙腳一樣擺得咁自然。稍嫌全車過多桃木飾板，後生有錢仔未必受落，不過大老闆就係 Buy呢種近乎晒命嘅豪華氣派。

■電鍍鬼面罩同長長飾邊，老闆車唔係事必沉悶。

■隱藏式雙出尾喉，緊貼潮流。

有跑格　踢走司機自己爽

■學越野車咁，懸掛可升起近 4"。

嘆完一輪豪華設備，對我呢類打工仔都係好離身，試車揸番轉先最實際。咩速度都行得穩穩定定，係豪華靚車必備條件，Phaeton另一好玩地方，就係滲入唔少跑格。用上 4.2L V8引擎，擺明以大最勝，唔加 Turbo同 Supercharger，馬力都有成335匹，錶板擺明車馬可以踩上 320km/h！雖然香港用唔着，改玩+/-過吓頭中段快感都唔錯，奇怪在居然有埋軚盤+/-波，仲要配埋19"派拉利薄胎，可能預咗老細忽然興起，踢走司機自己爽一爽都唔定。