日產 Murano　越揸越愛

新車落地當然有愛，但呢幾日我對住日產架Murano，更係越揸越愛，全因佢溫柔無脾氣，而且胸襟廣闊夠包容，仲任勞任怨無詐型。智能四驅及無段波箱，令行車順暢舒適，偶爾轉玩六速+/-，更會擦出剎那激情！

全天候伴侶
Murano分別有 2.5公升環保入門版及 3.5公升頂級版，今次作伴玩足全日嘅係頂級版。 3.5公升 V6引擎，馬力輸出 260匹，扭力達34.3kgm。香港多車多斜又多燈，高扭力車無疑更勝任，而且 Murano擁有智能四驅 All Mode 4×4-i功能及電子智能無段變速波箱，行車時能有效地因應路面情況而自行調節，又或者自主地轉波操控，更顯靈活矯捷，穿梭人車流量高嘅地區亦見靈敏好反應，興之所至玩轉 Off-road，轉頭斯斯文文揸佢返工都一樣稱職。要吸引男人，不經意流露嘅魅力相當重要，Murano嘅感光儀錶板就係絕招，一入隧道，眼前立體式儀錶板能自動感應光度變化而着燈，型仔又搶眼，呢份突如其來嘅體貼自然攞滿分。

■左側鏡附有盲點視泊鏡頭，大牛龜泊車都無有怕。

■門邊按鈕設計傾向駕駛席，更就手方便。

老婆都冧

■感光儀錶板，一入較黑地方就會着燈，超型！

性能、收視之外，長測最大體驗係能真正感受部車各種特性，好似門邊按鈕採用斜向駕駛席設計，不如一般水平設計，揸住車留意路面情況，同時都能清楚瞥見按鈕位置及用途。還有車尾及左頭輪盲點視像泊車系統，更有效地幫助泊位等。好多男士買車時都會諮詢身邊女友或老婆意見，Murano走實際多用途路線，外形又不失瀟灑，自不然同時贏得愛型愛玩講實力男士喜愛之餘，亦同時贏得講求好坐舒服又鍾意載物量多嘅女士喜愛。最重要係內櫳空間充足，放平後排，可變出 838公升置物空間，載人載物都勝任。男人勁冧「二奶」 Murano之餘，「二奶」仲幫手冧老婆。