Ford Kuga　 Young Look爭寵

用語、打扮有潮流，車款當然亦不例外，話四驅 SUV係近年熱選之一，相信無人反對。款式已經多到叫人花多眼亂，點知臨近年尾又突然殺出Ford嘅首部四驅 SUV Kuga加入戰圈，係咪 The Best就見仁見智，但一副充滿年輕活力嘅賣相、唔到37萬嘅價錢，仲有埋一大堆配備，超值。

外形年輕有活力
SUV新車一部接一部登場，若然真係想買車，都係一件幾頭痛嘅事， Q7、 ML、 X6、RX450h……等等一大堆名字，架架都總有人話好，難過皇帝選後宮佳麗。而今次最新加入爭寵嘅「佳麗」，就係首次到港嘅 FordKuga。車款設計由 Ford Iosis X概念車而生， 08年於歐洲首次曝光，成為第一部由歐洲 Ford生產嘅四驅SUV款式，由於第一代係以柴油推動，所以一直等到 09年尾先有機會將電油版引入香港。精心策劃爭 SUV市場呢塊餅仔嘅 Kuga，由Ford旗下最嚴謹嘅裝配廠德國Saarlouis一手打造，單睇充滿霸氣嘅車頭、既立體又富流線美嘅車側、圓渾有肌肉感嘅車尾，「美貌」已經好搶分，加埋炭灰色車身有銀色頂架及多處電鍍邊點綴之下，型格動感外形甚有年輕活力。

■後排有中央手枕及摺合式餐桌等簡單配備。

■拉低後排座椅，車尾空間大到連單車都放到。

歐洲 SUV平通街

■輕按手柄拉開半透紗簾，無接駁位嘅全天幕天窗夠晒氣勢。

高角度睇真 Kuga，竟發現車頂出現幻彩效果！原來係因為全幅車頂係一塊由車頭延伸到尾嘅反光玻璃，全天幕天窗絕對係Kuga嘅另一搶分點。力量方面， 2.5公升渦輪增壓引擎， 0-100km/hr只需 8.8秒，而引擎仲係符合更環保嘅歐盟5標準。再有埋恒時四輪驅動、Durashift五速波箱、循迹控制系統等輔助，即使試車時車尾載運大堆拍攝儀器、負磅上大斜路入彎，仍然感到充沛動力及輕盈易操控。除此，Kuga更獲得 Euro NCAP認證最頂級嘅 5星乘客安全標準。各方面表現出色，車價只係三十多萬，年輕人想搵架歐洲 SUV嘅話，實在非Kuga莫屬。