Mercedes-Benz C250藍血新成員　舊價換新 Look

一個有魅力嘅男士應要具備以下條件：外形俊朗又帶少少斯文氣質，細心得嚟又要夠力氣幫女士搬搬抬抬。呢個世界咁好嘅男人好難搵？不過佢就符合晒條件，Mercedes-Benz C250，佢最近更入主埋藍血統BlueEFFICIENCY家族，識得幫你慳錢慳荷苞。

慳油高達兩成

■ AMG泵把、霧燈托、鬼面罩等設計上嘅點滴配合，斯文中藏霸氣。

早幾個月，Mercedes-Benz家族首推老大 E250換血，令佢加入旗下更具代表性嘅藍血家族，領取BlueEFFICIENCY徽章。有此章在身嘅成員，都必須具備低油耗、高輸出及低排放嘅本性。身形較細嘅 C250亦趕及年尾換血，成為「C250 CGI BlueEFFICIENCY」。用上 E250一樣嘅細心臟， C250由之前嘅 2.5公升引擎改為 1.8公升，有CGI燃油直接噴注技術幫手，令汽油以噴霧形式直灑引擎，令燃油速度更快，達到慳油效果，亦保持原本 2.5公升引擎嘅表現。以往行走 100公里要9.1公升汽油，現在只需 7.3公升，大大減低油耗約 20%。以$14/L油價計算，都係$1一公里。

■後排闊度只屬中規中矩，但全真皮內櫳嘅貴氣帶來行政人員味道。

■中控台中間新添 Sport按鈕，操控更有跑味。

■ 1.8公升直四 Turbo BlueEFFICIENCY引擎有低排放、高輸出效果。

■中控台及儀錶面都係 Benz固有嘅豪華包裝。

新增跑格 Sport掣
外表一向斯斯文文嘅 C250，換血後更換上運動 Look示人，全套 AMG Sports Package上身，令外形更富動感，加埋 17吋AMG鋁合金輪圈、頭尾燈及霧燈設計上嘅配合，一副猛男模樣。運動 Look當然唔係虛有其表， 0至 100公里只需7.5秒，比換血前更快。再啟動全新嘅 Sport模式，懸掛更硬朗嘅跑車操控感立刻表現。 310Nm扭力可喺低於2,000轉時輸出，令人估唔到佢只得一個 1.8公升嘅細心。血統升級，但價格不變，特惠期間，銀底油（ MetallicPaintwork）更可以獲免加錢優惠。有名有樣有實力，魅力沒法擋。