280匹蓮王現身　清水灣道變紐堡林

LotusEvora由極簡變極豪，先不論坐得有幾舒服、加咗幾多高科技豪華設備，今次新車正式發佈，單係實試六速棍波已值得期待。入一波踩大油門，彈一彈極力子，Evora響胎直射飆前，清水灣道忽爾變身紐堡林賽道，幻想自己正為下年 5月嘅 24小時耐力賽熱身！

身輕癲得起

■後排有點逼狹，但總算容得下女仔或小朋友。

5月曾有架 Lotus EvoraPrototype到港，睇得唔揸得，牙癢癢一直等試車。事隔半年，香港終於正式搞發佈會，有真車可以過一過手癮。睇番架 Evora，同之前Prototype版本九成似，只係些微 Option位有唔同，不過自己個心早已飛往實試嗰 Part。試車都係圍繞將軍澳至大清路段，Evora貴為頂級版蓮花，配副 3.5L V6偈已經好勁。 280匹聽落唔算好癲，但唔好忘記 Lotus車身超輕，就算Evora加咗咁多設備同後排，都係約 1,200kg，用到咁高動力輸出推一架咁輕嘅車，要癲無難度。棍波已經夠好玩，Evora仲要配六速波箱。先試低波扭力，耐無揸棍波車，第一次搵磨擦點唔多準，不過引擎只係少少「打冷震」提醒我，唔似其他細車咁低扭力會易死火。頭段Keep玩高轉數，行山路密集式轉波，聽引擎都知仲有大把喺手，直路勉強升上4波，拖住千零轉依然飆住上斜，而且車身重心低，好多細微急彎都過得輕鬆，難怪廠方都改咗架 Evora Type 124參加下年嘅紐堡林24小時耐力賽。

■車輕偈勁，揸棍波 Evora起圍，真係要先控制好極力子。

內櫳設備大躍進

■後方擺咗副 V6偈，居然仲有不俗嘅尾箱空間。

近幾個月發佈嘅新車，都偏向將兩座位變成 2＋ 2，你睇保時捷都搞番架 Paramera就知。 Evora同樣反轉自家傳統，喺後面加多兩個位成4人車，成為全球首部配備 2＋ 2式座椅嘅中置引擎跑車，到底空間有幾多，一試就知龍與鳳。嬌小Model出入尚算輕鬆自如，坐定定只有少少頂頭，算合格。輪到我呢個高佬試，無頂頭，因為根本坐唔直個人，要將後排當貴妃椅咁打橫「坐」先得。成年男人免問，不過起碼女士同小朋友會坐得舒服好多。真心要讚嘅，係內櫳配備大躍進，車內鋪設全真皮，橙色皮襯Recaro賽車桶椅，格調高貴得嚟又唔老土。幾個金屬面板位帶出不少 Hi-tech味，睇埋 7"輕觸屏幕嘅 CommandCentre，藍芽免提、 iPod聽歌加導航乜都齊，一指掌控全車，感覺蓮花已進化至另一境界。