全港獨家神奈川實試日產 EV全賴有鋰

東京車展開鑼，未睇環保車大戰前，《夠 Car事》率先殺至日本神奈川日產試車賽道 GRANDRIVE，實試電能 TestCar，好力夠靜意料之內，最估唔到急劈一輪，嗰塊特別設計嘅鋰電，快叉 30分鐘即滿八成，我想飲啖水唞唞都唔夠時間！

六本木落腳，卻要晨早七點起身，再搭粒半鐘車嚟到神奈川縣橫須賀，就係為咗喺日產私家賽道 GRANDRIVE度試架 EV。落Track試電車？係咪「殺雞用牛刀」呢個係後話，甫到埗，日產方面先嚟個鋰電介紹。工程師亮起一塊大金屬片，原來係塊鋰電！仲薄過美珍香包豬肉乾，咁大架車靠佢？日產好鬼馬咁將鋰電設計成薄塊狀，其實只係整個蓄電系統嘅基本單元。每四塊為一個模組，再按車種需要放入若干模組。換句話講，即係想馬力勁啲、電量襟用啲，就放多啲模組，一盒盒咁砌入唔同嘅電車度，毋須因底盤車架有別，而要重新設計蓄電系統咁揼本，連座椅等內櫳設備都更易遷就，成本自然減輕，直接令車價大幅下調，好似下年推出嘅 Leaf咁，預計車價約 24萬港紙，全電推動都只比混能車貴少少咋。

■全球二十多位記者遠赴日本神奈川，實試日產電動車表現。

■ GRANDRIVE賽道全長約 4km，起伏上斜急彎爛路乜都齊。

■比 A4紙大 20%左右的鋰電，快叉之餘，散熱亦比傳統電池更好。

■每模組可放 4塊鋰電。

30分鐘充電八成
睇完咁過癮嘅薄電，一「落堂」即急不及待跳上架 EV Test Car度試車。預咗唔會快得去邊，輕描淡寫 6、70km/h當遊車河。點知指導員冷冷一句：「 Speed upPlease！」激鬼氣踩大「油」門，聽得出電摩打即時瘋狂運作，轉數直飆，居然帶點汽油引擎嘅氣勢。加速令人滿意，減速入完急彎， 5、 6秒已Pick up番 80km/h以上，座椅底下嗰大堆薄電，真係不可小覷。唔知係咪 TestCar關係，中央手枕嗰支所謂波棍，只可用兩隻手指「掂」住嚟轉波，雖然的骰得可憐，不過亦令駕駛艙更為簡潔寬敞。試完車，係時候幫架車叉電。打開鬼面罩上方一小塊頭冚，揸住條勁粗充電喉「隊」入去，「撻」一聲卡實就開始充電，第一次為汽車供電，感覺幾特別。工作人員指，充電站僅30分鐘已可叉足八成電，至於一般 100V電壓嘅家庭式供電系統，要全叉滿需 16小時，香港行 220V， 8粒鐘就搞掂，足夠你行 160公里！

■內櫳中控超簡，支波棍都幾乎搵唔到。

■專用充電站僅需 30分鐘就可叉 80%電力。叉電插座則設喺車頭。

日產電車兩大王牌

Land Glider前後各坐一人，似電單車側身入彎，型爆。

Leaf2010量產推出，外表平凡但內櫳極具科幻感。

混能+四驅 Infiniti G37好恐怖日產唔止喺電動車方面大展拳腳，試車當日仲有旗下另一品牌 Infiniti列陣，G37保持大馬力好劈特色，但卻換上全新 Hybrid引擎（HEV）。試車時導航員講明要狠踩，務求要你體驗到混能都可大馬力，以及咬彎貼地嘅四驅優勢。直路加速至100km/h以上，面臨一個又急又深嘅彎，踩腳掣減速至 80km/h都響晒胎甩住甩住咁入。第 2 Round時叫我再去盡啲，仲要 NoBraking！吓？過百公里唔踩 Brake入彎，我都想，但年紀大回晒塘，隻腳下意識點都要收吓油。估唔到繼上次架GS450h後，又一架混能車令我寫個服字。