發條橙的骰靈活

Mazda2上年先攞咗個「全年最佳汽車」獎，臨近 09年尾又再發力，推出更慳油嘅 1.3Max版；換上金屬橙色衣裝，依然充滿的骰小巧特色，揸住佢穿梭大街小巷，簡直好似上咗發條嘅橙咁，可愛得嚟仲相當靈活，無咁易俾大車恰到。

毋須花錢　買 Option
香港代理入車通常較大路，黑白銀睇到厭，見到架新版 Mazda2，全身閃亮金屬橙色，零舍搶眼吸引，出得切車嚟迎接聖誕去街街Fit晒。依照慣例，特別色大多當 Option咁要加錢，點知車價 13萬有找，居然包埋呢隻特別焗漆，呢度起碼慳番成萬蚊，當堂對架 Mazda21.3 Max加分。

■行貨車中較少見嘅金屬橙色車身，相當吸引。

■下方氣壩位用上蜂巢式欄柵，充滿運動感。

■原廠 15"合金輪圈賣相都唔錯。

■一小塊尾翼，增加車身精緻感。

■車尾線條有番 Mazda2風格，底部黑色擾流生色不小。

內櫳佈局大變身，整個駕駛艙更圓更有層次，而且波棍變短及貼近司機身邊，操控上有種舒服就手嘅感覺。個人嚟講，最欣賞Mazda車系呢幾年嘅作風，就係不論車價有幾抵玩，跟車標準配備一啲都唔寒酸。今次一樣有驚喜，除咗金屬橙車身，仲有全車包圍、泊車感應器、軚盤多媒體Short Key、白錶板、 AUX in音響插頭等，算係幾大手筆，若果對胎軨無乜要求，原廠 15"已 OK嘅話，基本上出新車毋須再花錢配Option。

鬧市穿插易睇位

■原廠採用布藝座椅，比絨 Seat更易清潔打理。

的骰細車格，可能你會覺得 90匹馬力不過不失，不過試車時喺將軍澳、秀茂坪至觀塘繞道等地區遊走，起步當然唔會一支箭咁飆，不過已算扯得起，表現比好多1.3L車仔優勝，啪落 L波或 S波起步，更加包你有意外驚喜。鬧市多人多燈位，小巧車身發揮靈活入彎及過車優點，而且A柱設計不俗，令駕駛視野增闊不少。當轉波密度提升，CVT無段波箱就發揮到好處，上落波段絕對順暢自然。刻意提高轉數，升波時依然無突兀頓挫感，揸同坐都好 Smooth好舒服。由於 1.3Max有環保減稅優惠，所以 12.9萬買到架咁齊料嘅自動波車仔，好抵玩。得一想二咁諗，手波版會唔會平多萬幾蚊咁嚇人呢？ Sorry，手波版得1.5L，馬力亦去到 103匹，所以車價要$143,990，不過已比同型號自動波版平咗 6千蚊。