愛妻號 Noah

今日請丘仔（丘建威）來，並唔係講波，而係講車。係男人都鍾意車，但步入人生不同階段，都有截然不同之選。從年少氣盛，到現在家有嬌妻再添丁，丘仔揀車心態都不斷轉變。現時除了於電視講波、教波以及寫球評之外，更全職湊仔老婆，就連揀車都係以家庭為先，指明要試 Toyota嘅七人車，我哋就覺得Family Car新貴 Toyota Noah都幾啱佢要求！

老婆 BB大晒

住家男丘仔錫老婆錫到燶！現時揸嘅 Audi A4，車牌都係舊時女友現任老婆嘅名字與生日嘅縮寫，好不Sweet！家有了五個月大小寶貝，係咪時候換車先？「係啦！以前細個一考完牌就買咗架飛仔車，後尾見皇馬魯爾成 Team人都揸Audi，就即刻換車！不過，現時買車會考慮好多因素，例如二手價嘅硬淨程度，歐洲新車落地一年唔見三成，所以都係日本車值租，唔驚無人接手。」如此說來， Toyota Noah都幾合丘仔心水喎。丘仔過往一直有點抗拒揸七人車，恐防自己看似「柴可夫」，但現時家庭為先，一切都拋諸腦後。Noah外形四四方方，徹頭徹尾係家庭車，內櫳寬敞，對他來說都係一大誘因。「我最欣賞係佢嘅座位設計，8座設定相當靈活，中排三座設計可變成兩個獨立座位，更可作出180度旋轉，與尾排對坐，方便照顧小孩。另外，中後排都可以收摺，真係咩雜物都可以放得落！」筆者不忘向丘仔補充，新增設嘅遙控雙電趟門連接感應器，除可自動開關外，遇到有障礙物會即時回彈，日後小孩長大，自己會上車落車時，都可以更安心啦！

油慳家豪奶粉

■丘仔欣賞中排座椅可 180度旋轉嘅設計，照顧 BB好方便。

交流一輪波經車經，大家一同上車，走了一轉青山公路，試試 Noah實力。筆者安坐乘客位，舒適度當然毋庸置疑，至於動力方面呢？丘仔嘅測試結果係， 1,986cc雙凸輪軸配雙VVT-i引擎能發出 143匹最大馬力及 19.8kgm嘅峯值扭力，不論係上山或係平地，都能感受到其足夠嘅力量。 SuperCVT-i無段變速自動波箱，提升速度極順暢。跳出S檔試試，引擎轉速多轉一千轉才升檔，加速感更明顯。此時，麥花臣及扭力桿嘅前後懸掛系統便發揮出最強威力，高強嘅穩定性，令置身車廂內嘅乘客依舊舒泰。家住元朗嘅丘仔，經常要返荃灣有線大樓講歐聯，所以座架嘅耗油量都係佢關注嘅議題。不過據資料顯示， Noah耗油量13.4km/L，同級車中最低，絕對可以消除佢嘅疑慮，而且車上更備有ECO節能駕駛指示燈，能夠顯示車速與油門角度等數據，提示車輛以最省油嘅模式行駛，夠實用，丘仔更多奶粉錢使啦！