誓買Benz E-Class垃圾佬升呢

跟陳山聰相熟嘅人都知佢係名牌粉絲，衣褲鞋襪無一不講究，更當日本係第二個家，一年走幾轉去入貨，風格似乎同喺電視劇《絕代商驕》中飾演嘅環保垃圾佬童一本剛剛相反。稍為同慳儉扯上關係嘅，似乎就只有揸咗幾年都未換嘅 bB。不過問到 Dream Car，佢劈頭就話：「 BenzE-Class」。原來「垃圾佬」要升呢買歐洲車事在必行，更決心定下目標，喺 2010年尾前誓要 E-Class到手。

愛豪房年輕化

■問佢架車邊度令佢最驚喜，佢話：「估唔到有得揸，已經夠我有排開心。」

平治車系一向係唔少人心目中嘅 DreamCar，喺眾多車款選擇下，陳山聰絕無三心兩意，立場堅定，最愛E-Class。「細個時淨係識得要跑車，睇房車唔順眼，人大咗開始明白開工最緊要架車實用，所以買咗 cc較細空間夠大嘅Bb代步，家就會覺得房車好斯文有型夠氣派。一路想換歐洲車揸，鍾意Benz係因為車價夠硬淨，配件改裝價錢又平民化咗，款式又襟興。一直想買上一代 E仔，因為覺得佢係豪華房車中最有型， E-Class雖然無S-Class咁大，但感覺 Sport啲，尤其新一代嘅外形。」全新 E350 Avantgarde嘅車型代號係W212，造型同風格跟上一代的確有幾大改變，車身線條更有肌肉感，換上菱形頭燈，加埋十分搶眼嘅LED照明細燈，形象夠貴氣之餘，感覺更有動感更年輕。

■ E350平均油耗只係 9.3至 9.7L/100km。

■特大天窗曬日光，啱晒鍾意曬黑嘅山聰。

■菱形頭燈下有 LED細燈點綴，形象鮮明。

■專注力警示系統最啱一眾夜收工嘅藝人。

全程嘩嘩聲愛潮牌、打扮年輕嘅山聰大可以揀感覺更潮嘅 C63 AMG或者 ML350等款式，但唔愛快只愛外形、計過自己荷包嘅佢，目標咁鮮明仲有一個原因。「我有個朋友將架E仔加晒黑色包圍、改晒全黑軨，個樣惡咗，仲型仲靚，我買E仔嘅話，都一定要咁改。」鍾情一架車，除咗外形，內涵都有一定吸引力，尤其呢架係配備豪華嘅E-Class。呢日有機會畀佢親身試揸去西貢拍攝，佢全程不停嘩嘩聲，「嘩！我好似個大鄉里咁，真係要慢慢摸吓啲掣點用。」「嘩！有埋導航系統。」「嘩！幾好力，話過車就過車，上大斜路好似行平路咁。」「嘩！車廂靜到咁，仲舒服到好似坐喺梳化揸車一樣。同揸日本車完全唔同感覺。軚感好實在，感覺硬淨，入彎你會好放心畀佢去。」引擎採用燃油直接噴注技術，加埋風阻系數只有 Cd0.25，當然又慳油又靜。唔知仲以為佢賣緊廣告，但睇見佢甜絲絲嘅笑容，雙眼閃閃發光，就知佢買E仔一定走唔甩。自言近百萬嘅車對佢嚟講仲係遙不可及嘅事，但一樣定下目標希望 2010年尾前買架入門版 E 250。