由法國到香港黃長興堅持推棍

香港先生又嚟喇，大家都好期待像大癲大廢嘅伍詠薇摸大隻男嘅爆笑場面。原來，唔經唔覺第一屆嘅香港先生黃長興（Stephen）原來已經係四年前嘅舊人。雖然由當選一刻起就擺明要融入香港，但被標籤係法國人嘅Stephen依然有法式情意結，揸車都揀番法國品牌Peugeot，身處喧鬧嘅香港，佢話最好有架開篷畀佢慢慢嘆，有架棍波畀佢瘋狂飆一飆。

■ 207有超大天窗，但 Stephen覺得始終無開篷咁自在。

第一屆香港先生黃長興近期最多嘅報道都係圍繞佢弟弟黃長發，護弟心切嘅佢其實都幾煩惱，所以平日一有時間都鍾意揸架電單車去赤柱吹吹風。「我好鍾意揸車，細個喺法國讀書時就年少氣盛啲，揸住架車同朋友周圍飛。家大咗，就鍾意揸車去啲風景靚嘅地方欣賞吓曬吓太陽，咁先可以放鬆心情舒緩壓力，所以夢想係買架開篷車。」

■ Feline頭燈夠氣勢，更有轉向功能。

■尾燈以蜂巢般嘅小燈點綴，係最搶眼嘅地方。

■ Stephen認為輪胎係一部車嘅靈魂，呢條 17吋輪胎十分合佢心水。

■尾箱空間充足， Stephen認為係代步車嘅選擇條件之一。

為開篷唔怕食塵
香港地方細車又多，總覺揸開篷車只會食塵。「唔緊要嘅，間中食一次半次無所謂啦，開篷車先夠Relax。不過我都覺得好奇怪，法國咁大就好多人鍾意揸細車，香港咁細就好多人鍾意揸大車，好似呢架207車仔喺法國好受歡迎，我之前喺法國都有揸開 206。」揸住架黑色 Peugeot 407嚟做訪問嘅 Stephen，情迷法國Peugeot唔係得把口，「少少情意結，有機會梗係要撐吓法國牌子啦。事實上，我覺得Peugeot呢個牌子設計好、性能好、引擎又好，價錢唔算太貴，代步車都會首選佢。加上可能以前喺法國Peugeot做過半年生產工作，對佢特別有感情。」 18歲考牌即刻揸車，由法國揸到香港，炒過兩次車都無損佢對揸車嘅熱愛。「 19歲嗰年揸架Volkswagen，人改我又改，淨係換咗 18吋軨，但唔夠錢整避震。同人出去飆車時，避震唔夠，入彎成架車反轉咗 TotalLost，但我爬出車都唔理自己有無受傷，第一句係話：『我啲軨呀！』哈哈。」

■ Stephen話德國引擎最好， 207嘅引擎就同寶馬 MINI合作生產。

■雖然係雙門車仔，但後座空間一樣十分寬敞。

■中控台感覺平實，頂部顯示屏有行車資訊、 5個位安全帶提示燈。

■ 5前速棍波 Stephen認為係部車表現更有力嘅要點。

由巴黎揸車去非洲
無論喺法國定係香港，十幾年嚟Stephen嘅最大娛樂就係揸車。「家唔係唔鍾意揸快車，但會搵較安全嘅途徑發洩。呢排唔使忙拍劇，我都周圍問朋友邊度有得試吓參加比賽，想玩吓高卡車先，希望一步步向落場比賽嘅目標進發。我嘅夢想係參加 ParisDakar，揸住架越野車由巴黎去非洲，四千公里嘅路程可以觀光又可以享受揸車嘅樂趣。」人成熟咗唔會亂嚟，更加學識錫自己架車玩人哋架車，上車試揸207突然響軚，跟住陰陰嘴笑住返埋嚟，「響軚嘅感覺真係好正，好耐無試過喇！棍波始終感覺Powerful好多。啲人話香港成日塞車唔適宜揸棍波，我又覺得唔關事，巴黎都好塞車，好多時塞足一個鐘，我都唔覺得辛苦喎！」大佬，吊極力子吊得耐真係會腳軟㗎，你個揸車狂先唔覺咋！