加嚿電Prius節能升級

古天樂話你知買輪胎能節能，好多人笑住明白此大道理，但講節能始終都係電能車最好。混能車Prius一向口碑不俗，慳油效果十分理想，但估唔到混能車仲可以加大嚿電自己叉，耗油量再減半原來好鬼Easy，不過大嗱嗱用十萬蚊加電，真係要攞個心出嚟為環保先捨得。

中電市場及客戶服務部總監周先生

大家對電能車無信心只係心理作用。

中電高級策略規劃師 Ron

要慳油當然要配合揸車習慣。

■充電步驟好簡單，喺車尾插入電線即可。

喺香港，知道Hybrid車嘅大有人在，不過肯為環保作新嘗試嘅人似乎依然有限。政府今年大力推動電能車，就係希望大家共同朝着追求節約能源嘅汽車文化出發。唔少人都知電能車分全電能同混能兩類，但原來仲有 Plug-in Hybrid第三類，中電就率先找來加州一間換電公司，幫混能王Prius大改裝，加大嚿電之餘，仲可以自己充電，務求可以慳上慳，鼓勵大家對電能車多加了解。中電市場及客戶服務部總監周先生解釋呢項加電搞作嘅原因：「我哋整架車出嚟唔會賣，只係希望透過我哋嘅測試令大家對電能車有更大嘅信心。揀 Prius去加電，係因為政府方面試緊一架三菱嘅全電動車，但Plug-in Hybrid喺市場上就暫時未有，所以我哋好想知佢喺慳油呢方面有幾大幫助。」

■插入車尾嘅係圓頭三腳電插。

■而另一端就係普通家用三腳電插，住獨立屋嘅車主可以隨時充電。

加大嚿電一日搞掂
唔少政府部門都引入 Prius作環保車隊，中電亦唔例外，高級策略規劃師 Ron稱：「我哋環保車隊約有 17架Prius，員工都會記錄低所有行車記錄，發覺每行 100公里大概需要 6-8公升電油。」由第一代用到家，所以對 Prius較為熟悉，夠膽將Prius加電作測試。起初以為將架 Prius換電會好複雜，原來好簡單。佢哋從美國加州請嚟專做 Plug-inHybrid嘅公司，對方只係用咗一日時間，就完成改裝。混能車本身嚿電可以邊行邊充，更可因應行車情況自動選擇用電還是用油， Plug-inHybrid嚿電一樣得，仲可以慳得更多油。周先生指：「其實加電係要換過一嚿新電落去，只係令電力供應加強四五倍左右，而其他嘅運作系統並無改變。根據我哋嘅數據，發覺加電後，每行 100公里，比普通 Prius多慳 3公升電油，更環保之餘，仲可以自己充電，唔一定靠行車充電。充電約需4-5個鐘，可以行 50公里左右。」

■車尾安裝咗一個數據機，記低所有行車資料以作研究。

■換電池後嘅 Prius只需充電 4-5個鐘，就可以行 50公里。

■螢光幕會顯示充電情況，紅色數字顯示約 55左右代表充滿電。

■跟原裝 Prius一樣，行車時用電定係用油都會話你知。

■新電嘅電量大咗，尺碼都大咗，唔多唔少都會影響車重。

■換電公司有唔同 Package供應，中電選 Gold Peak電池及 Battery Tender叉電器。

100公里慳 3公升
即係話，加電後嘅 Prius每行 100公里只需 3-4公升油，計埋每小時約$2-$3電費，聽落好似好化算，但原來換嚿電都唔算平。「買一Set電能套裝要萬幾蚊美金，港幣計差唔多十萬，唔同牌子嘅電池亦唔同價錢。所以我哋揀咗架用咗四五年嘅車換電，化算好多。」Ron解釋。雖然政府大力催谷電能車，但配套又足唔足夠呢？「其實運輸署都有好多規管，因為呢個類別暫時都好新，佢哋都好合作，希望安全方面確保無問題先發牌，暫時都係等。而配套方面，我哋都明白大家對充電設備嘅憂慮，我哋同領匯商場、 Wilson停車場都已經有咗初步共識，市場上一有Plug-in Hybrid嘅車賣，就會立刻安裝充電設施。其實 Plug-in Hybrid車嘅滲透率都需要時間，我估計2011年先有車到，但我哋可以話畀大家聽，充電配套係完全無問題，就係拉幾條電線咁簡單。」周先生充滿信心。