Nissan GT-R Premium Black Edition着高踭鞋飆加辣 GT-R

「Van 仔」係鄧穎芝 Vangie 暱稱，人可愛但偏愛辣跑，自出道已經試過唔少勁車，今次試車會唔會反其道而行，估佢唔到呢？ Sorry ，毫無意外，都係勁車，「GT-R 吖唔該，要型色喎。」乜係型色呀？黑色應該啱嘞啩？「我鍾意白色喎。」不得不說， Vangie ，你真係好難估。

■ Vangie 一上車即引擎聲不絕，除咗停車一刻，佢真係揸得好興奮。

試車第一步換鞋！
一身古銅膚色嘅 Vangie 絕對係外向女孩，「超鍾意運動，尤其係水上活動同籃球。」見佢細細粒，估唔到佢咁 Sporty ，或者就係因為好動，所以主持網上電台《潮頻道》體育節目，「我係咪好男仔頭性格呀？我 … … 」「佢真係好男仔頭㗎！」都未講完， Vangie 保母已經予以肯定，兩人即時笑作一堆，好孩子氣。

係咪因為男仔頭，所以情迷辣車？「我因為鍾意揸車，之後至鍾意車， 18 歲考完牌諗住要部 MINI Cooper ，你知喇，十個女仔九個都鍾意，夠得意嘛。」記憶中 Vangie從未擁有過得意車仔，「係呀，考完牌，屋企人以安全為理由，送咗部二手 C180畀我。」貪部車夠硬淨鍊車夠安全？「係呀，你點知呀？」感同身受囉！「我不知幾唔願意，你明喇！」夠紮實但唔係幾型咁啦！「係呀係呀，所以一年後嘅生日禮物係 CLK 跑車，型啲先見得人 … … 不過我最想換部四門辣車，或者 SLK 啦，可以車埋朋友出街玩，又型！」換來換去咪又係同一個牌子？「哈 … … 又係喎。」咁鍾意型，咁今日順便挑戰埋 GT-R 喇，「好 … … 」 Vangie 講完個「好」字就走番入保母車，做乜？換鞋！竟然唔着平底鞋，換番對高踭鞋試車，咁都得？

■ Vangie 至冧承托力足又型嘅跑桶椅。

■ 一話可以試車， Vangie 即時跑去換高踭鞋。

■ Vangie 手車只可以用一個字形容 ─ ─ 辣！

■ 改裝頂級版 Black Edition ，車櫳用上大量黑色物料及碳纖。

■ 3.8 公升雙渦輪六缸引擎，雙 Turbo ， 480 匹馬力，當然勁喇。

佢踩油我心跳
「我最重視外觀，最好有包圍，型啲嘛，望真部車幾型，但點解咁多碳纖，少番啲型啲喎。 18 吋黑軨，型，車尾四圓燈先至最型 … … 桶椅都好正，唔知包唔包得晒呢？嘩！尾箱咁多喇叭，呢個係擴音器？好型喎 … … 」講咁耐，即係催我俾佢快快上車啦， OK ，出發喇！

隆 ─ ─ 嘩！引擎聲真係未停過，引擎每隆一聲，我個心隨即卜卜跳， Vangie 試得認真，我就有啲擔心，不過，女孩劈 GT-R ，又真係好型。隆聲飆近， Vangie 落車，「嘩！同我想像中一樣咁勁，細細力咋，已經 80 公里喇，估唔到行住車都可以聽到歌詞唱到歌呀 … … （一輪嘴說個沒停）」乜有跑車行車時聽唔到歌詞咩？「林 … … 嘿！費事俾朋友鬧。」

■ 尾箱位置，有多個高效音響喇叭及擴音器。

■ 跑車起碼要有 18 吋黑色合金輪圈！ Vangie 嘅睇法。

■ 四圓尾燈最型！係！亦係 GT-R 特色。

後語　唔笑就係型
整個訪問，聽得最多係個「型」字，乜嘢係型？「唔笑就係型喇。」 Vangie 咁睇。係？整個型 Pose 影相吖？佢二話不說來個特大超誇張大字形趴地 Pose ，吓？全場即時爆笑；坦白講，佢真係好鍾意郁，超多表情同身體語言，同佢做訪問，好開心。

加辣改裝拆解
點解呢部 Black Edition 會令 Vangie 眉飛色舞？因為係超級改裝版，人工包料改裝費要成差不多 $100,000 ，令車身性能馬力更強悍，有乜改裝部件？

碳纖頭冚　 $28,000
鬼面罩　 $4,900
碳纖尾翼　 $12,000
音響　 $48,000
碳纖內飾　 $4,500