可愛 Fiat 500 　 Bad boy 上身

Fiat 500 Abarth esseesse
$318,000

上年 Fiat 500 復刻，喺歐洲掀起懷舊熱，全車圓圓碌碌鬼咁得人鍾意，行貨到港後都多咗女仔做車主。最近出現嘅一部 Abarth esseesse 版 Fiat 500 ，雖仍偏圓但可愛不再，加 Turbo 加包圍拉埋花， 160 匹火氣撩人，若你當佢得意 o靚仔想伸手摸人頭殼頂，分分鐘俾佢反手撻番落地。

■ 紅蠍為 Abarth 標誌，以拉花貼係頭冚，如紋身般帶點反叛味。

招積紅蠍拉花Fiat 500 喺歐美有着與甲蟲及 Mini 等相若嘅復古地位，雖然全車圓圓碌碌，卻非事必「童年現在一般可愛」。有別坊間私人改裝， Abarth 打正旗號專改 Fiat 500，情形等同 Benz × AMG 、 Toyota × TRD 一樣，所有改件都經官方認證。其實Abarth 係越野車手名，幾十年前自改 Fiat 500 ，最招積係打開尾門當尾翼，居然又俾佢 Win 到唔少國際 Rally 賽事，響朵後就被 Fiat 招攬幫手改 Racing Car 。雖未至面目全非，不過 Abarth esseesse 改裝套件郁動都唔細，最明顯係車頭，原有扁橫低矮鬼面罩兩側加設網狀氣壩，整套型仔包圍一直延伸至車尾，再將側鏡噴紅，好老套但最貼切：跑味濃郁。拉花同全車 8 個蠍子金屬章最嚇鬼，全白車身拉兩條紅線喺車腰， Sharp ！車身四面、四條軨都鑲咗蠍子牌，霸道得嚟帶 DevilFeel ，天真無邪小朋友最初都嚇親。

■ 黑色尾擾流跟車頭鬼面罩呼應，雙出喉中喉一絕。

■ 鋼琴白 × 黑色駕駛艙，比全白襯得更靚。

■ Turbo 比之前 S 版增壓力更強，令馬力達到 160 匹。

■ 五速手波波棍車咗三條紅線，揸落手感相當唔錯。

■ 揭背車尾設有油壓管，夠實淨唔怕撼親夾手。

3,500 轉爆 Turbo到港水貨為棍波版，跟復刻版一樣採用 1,400cc 偈，真正值錢處在於加入超勁Turbo ，馬力 160 匹。咦，乜咁似剛到港嘅六代 Golf GT ？著名車評人 MichaelShum 就話 Golf 絕對係好車，但咁樣比唔公平，應該跟同樣細車身、單門車嚟比，如 MINI Cooper S 、標致 206 等，咁睇 Fiat 500 Abarth 都幾突出喎，約3,500rpm Turbo 便介入，而且嚟得好順唔突兀，五前速手波每一段都有力。

Michael喺塞車到嘔嘅灣仔、中環行咗幾圈試車，短短直路 123 波快速上上落落，好耐未Feel 過棍波車嘅爽勁喇，坐喺隔籬已經令我好滿足。至於 Michael 最欣賞嘅，係Abarth 嘅路面感，細車做到內櫳唔擠逼侷促已算叻仔，傾斜得有點誇張嘅方向盤，令駕駛者雙手伸得較直，軚環夠粗有實在感，整個試車感覺相當舒服。