當美國多處地方正受熱浪侵襲，原來有股龍捲風都喺美國肆虐，所到之處令對手防線風聲鶴唳、城池連根拔起，講嘅當然係由紅魔捲起嘅風暴。繼之前炒新英倫革命 4個 1皮，周三輪到西雅圖海灣者被呢股風暴蹂躪，慘吞 7隻蛋。呢股龍捲風稍後會席捲芝加哥（對芝加哥火燄）、新澤西（對美職明星隊）、華盛頓（對巴塞隆拿），除咗巴塞，怕且隊隊都聞風而逃。
朗尼中三元炒夠 7粒
連續兩場大勝，證明曼聯今次美國之行並冇揸流攤，而得意嘅地方係兩場波曼聯都表現慢熱，大部份入波都嚟自下半場，而且都係後備兵做主角。上個禮拜大勝新英倫革命，主角係後備上陣梅開二度嘅馬捷達；今次大炒海灣者，功勞首推下半場上陣後連中三元嘅朗尼，至於其他入球者包括上半場唯一建功者奧雲、馬美迪奧夫、朴智星同埋奧巴坦。
曼聯今次征美相當畀面，呢場波正選陣容由奧雲同馬捷達擔任，中場由艾舒利楊格、拿尼同埋新聞天王傑斯策動，防線就出晒尼曼查維迪、里奧費迪南、拉菲爾達施華同埋艾拉呢個常規正選組合。曼聯周六出征實力比海灣者更弱嘅芝加哥火燄，隨時又展示破壞力；而下星期三同美職明星隊交鋒，怕且明星隊有亨利、碧咸同埋當路雲等名將壓陣，依然抵擋唔住。
里奧自詡最強 5人組
近期狀態唔錯嘅里奧費迪南，日前透露佢好享受喺練習時踢 5人足球賽，仲話歷來最強 5人組係史高斯、基斯坦奴朗拿度、朗尼、堅尼同埋－－佢自己喎。佢話：「呢個組合係無敵，我們一直控球在腳，唔需要龍門。」里奧自大完之後，又爆料話原來傑斯好鍾意 rap，仲係舊派說唱能手，每次贏波派對總要爭住搶咪。冇用，就算你講到傑斯佬有音樂才華，家陣一講起佢大家都另有所思啦。 |
發表於 2011-7-22 12:16 PM
| 
