真係好懷疑，阿仙奴喺新一季英超仲會唔會係爭標分子。點解咁講？因為佢哋慘成其他大會嘅挖角對象，繼法比加斯、基捷基治同拿斯尼後，連禾仔、尹佩斯同艾沙維都可能會走人。兵工廠入面居然冇晒啲軍火，你話點同人打呀？
最新傳車仔搶禾確特
歐洲眾頂級球會喺今個夏天入貨，但阿仙奴就出貨。如無意外，阿仙奴應該留唔住法比仔、拿斯尼同基捷基治，其中基治幾可肯定以 800萬鎊（約 1億港元）過檔曼城，只係差少少細節；拿斯尼就可以喺曼聯同曼城之中二選一，如果去曼城，周薪就由 9萬鎊跳升至 18萬鎊，但佢唔認為自己係銀紙至上：「錢從來唔係我嘅考慮範圍，我只會從足球方面去諗。」法比仔就極有可能以 3,500萬鎊返母會巴塞隆拿，而且聽講今日唔會返兵工廠參加開操添。
球隊俾人拆骨，領隊雲格經已頭痛，不過咁都未算，事關據聞車路士加入戰團，入兵工廠搶貨。英國《星期日郵報》就話，車仔睇中阿仙奴嘅英格蘭翼鋒禾確特，聽講仲願意出 2,000萬鎊買添。禾仔喺 09年先同阿仙奴續約 4年，唔好似基捷基治同拿斯尼咁喺明年夏天就約滿，其實雲格冇乜必要要賣佢，但問題係禾仔容易傷，加上個價咁靚，冇理由唔做呢單生意啫。另外，加拉塔沙雷亦打阿仙奴球員嘅主意，計劃用 1,350萬鎊簽喺英超發展得麻麻嘅俄羅斯前鋒艾沙維。
賣走主力尹佩斯即閃
如果雲格賣咗基治、禾仔同艾沙維，又留唔住拿斯尼同法比仔嘅話，除咗令阿仙奴嘅爭標能力受損，仲搞到陣中嘅大牌球員有離心。英國《星報》就報道，尹佩斯講明唔在乎雲格簽唔簽新球員，淨係關心現有主將走唔走，如果班主力走晒，自己留喺度都冇意思，所以一定要求離隊。
新一季英超下月 13號就開波，廠迷當然希望到時阿仙奴嘅 4號、 8號、 10號、 14號、 22號同 23號，同上季一樣冇轉人就好嘞！ |
發表於 2011-7-4 10:21 AM
| 
