阿仙奴日前推出新一季作客波衫，身為隊長嘅法比加斯竟然冇得做宣傳，另一主力拿斯尼雖然喺度，不過笑容幾牽強吓，照咁睇，兵工廠呢兩大中場走頭嘅機會好大。曼聯同埋利記狂簽猛將，但阿仙奴就有出冇入，唔怪得領隊雲格要寫封水蛇春咁長嘅家書安撫球迷啦！
拿斯尼想成魔笑唔出
阿仙奴喺 11/12球季有件創會 125周年嘅特別版作客藍色波衫出街，而喺佢哋官網首頁張宣傳大相，由左至右分別係施捷斯尼、華美倫、韋舒亞、基蘭基比斯同埋艾朗藍斯，但傳緊分別過檔巴塞隆拿嘅法比仔，以及轉會曼聯嘅拿斯尼，兩個人影都冇。據聞兵工廠肯賣法比仔畀巴塞，問題係巴塞籌唔到旗；即使法比仔願意唔收簽紙費同減薪，巴塞最多都係攞到 2,700萬鎊（約 3.4億港元）出嚟，同阿仙奴要求嘅 4,000萬鎊仲有好大距離。英國傳媒話巴塞為咗逼阿仙奴減價，賤到用奸招，唆擺法比仔同兵工廠搞對抗，唔參加球隊即將展開嘅季前集訓。
其實，阿仙奴向來唔會同錢作對，只要巴塞畀到個合理嘅價錢，法比仔單交易仲有得諗。唔知係咪都諗住賣法比仔，所以兵工廠亦冇要法比仔宣傳件最新嘅作客波衫。至於傳緊過曼聯嘅拿斯尼，雖則冇喺官方首頁張大相出現，但都仲有份影硬照同拍宣傳片。喺阿仙奴官網睇見拿斯尼個心似乎已經唔喺兵工廠，事關佢笑得鬼死咁牽強，唔似得韋舒亞同施捷斯尼等人咁 enjoy囉。講真，阿仙奴寧願喺官網首頁用基蘭基比斯呢啲鹹蝦燦，都唔用拿斯尼，大家心照啦！
曼聯同利物浦喺今夏球員轉會市場已出咗手，其中前者仲斥資 5,000萬鎊簽咗菲爾鍾斯、艾舒利楊格同迪基亞 3件高質新星，而車路士同曼城雖則未出手，但都講明買球星。阿仙奴唔入貨都算，仲要出貨，可能賣走兩件最好嘅，唔怪得雲格要寫封家書同球迷剖白（英文全文可登入 www.thesun.co.uk/sol/homepage/sp ... enal-supporter.html查看。）。
睇過封家書後會明白雲格嘅苦況，但現代足球最講成績講功利，做唔到呢點，真係喊出聲都冇用啦。
高價買人不合情理
1.球會建新球場耗了一定資金，預計都會有幾年的艱難過度期。
2.球員傷患頻頻，法比加斯上陣不足一半的賽事，尹佩斯只能於下半季復出，華美倫更只踢了數場賽事。
3.對抗「大花筒」唯一是加薪，在財政基礎之下合理加薪。阿仙奴有力擊敗任何對手，世界上只有一隊曾擊敗巴塞兩次，那就是阿仙奴。
4.現在的球員缺乏耐性，未能上陣或不適應球隊戰術就經常要求轉會。
5.球隊絕不會以不合情理的高價購買球員，亦不會以不合乎經濟利益下，用高薪挽留球員。
註：節錄自雲格家書。 |
發表於 2011-6-29 10:16 AM
| 